About The Role

Ísafjarðarbær auglýsir eftir þjálfurum fyrir íþróttaskólann á Flateyri, Suðureyri og Þingeyri. Æskilegast að viðkomandi geti hafið störf 1. september 2026 eða eftir nánara samkomulagi. Um er að ræða tímavinnustörf þar sem þjálfun á Flateyri fer fram á þriðjudögum og miðvikudögum frá kl. 14:00 til 15:00, á Suðureyri á miðvikudögum og fimmtudögum frá kl. 13:00 til 14:00 og á Þingeyri þriðjudaga og miðvikudaga frá 14:00 til 15:00. Þjálfarar eru í nánu samstarfi við yfirþjálfara íþróttaskólans. Umsóknarfrestur er til og með 31. ágúst 2026.

Íþróttaskólinn var settur á fót haustið 2011, er samstarfsverkefni HSV, aðildarfélaga HSV og Ísafjarðarbæjar og er rekinn af Ísafjarðarbæ. Skólinn er fyrir öll börn 1.-4. bekkjar í grunnskólum Ísafjarðarbæjar. Lögð er áhersla á grunnþjálfun og að börnin fái þjálfun í flestum þeim íþróttagreinum sem í boði eru á eldri stigum aðildarfélaga HSV.

Markmið skólans eru að

hvetja og fá sem allra flest börn til að iðka íþróttir
fyrstu kynni barna af íþróttaiðkun séu jákvæð
börn fái tækifæri til að kynnast sem flestum íþróttagreinum
auka gæði þjálfunar
lækka kostnað heimila við íþróttaiðkun barna
auka grunnþjálfunarhluta æfinga, almenna hreyfingu, hreyfiþroska og hreyfigetu

Helstu verkefni

Umsjón með starfi íþróttaskólans á viðkomandi stað, skipulagi og þjálfun íþróttagreina
Útbúa æfingaáætlun fyrir grunnþjálfun, boltaskóla og sund í samstarfi við yfirþjálfara
Aðkoma að gerð stundaskráar
Samskipti við aðildarfélög, þjálfara aðildarfélaga, dægradvöl, foreldra og forráðamenn barna í Íþróttaskólanum
Skráning í Abler

Hæfniskröfur

Reynsla af þjálfun barna
Þjálfaramenntun eða önnur menntun sem nýtist í starfi er kostur en ekki skilyrði
Þjálfari þarf að vera fyrirmynd fyrir börn og fullorðna og koma vel fyrir
Jákvætt hugarfar og góð samskiptafærni
Sjálfstæð og skipulögð vinnubrögð
Sveigjanleiki og ríkur vilji til að vinna með börnum eru skilyrði
Íslenskukunnátta
Áhugi á uppbyggingu íþróttastarfs í Ísafjarðarbæ er mikilvægur kostur

Launakjör eru samkvæmt samningum launanefndar sveitarfélaga og viðkomandi stéttarfélags.

Umsóknir skulu berast til Dagnýjar Finnbjörnsdóttur, íþrótta- og æskulýðsfulltrúa á netfangið <[email hidden]> . Með umsókn skal fylgja ferilskrá og afrit af prófskírteinum.

Nánari upplýsingar um starfið gefur Dagný í síma 450-8000 eða í gegnum fyrrgreint tölvupóstfang.

Við hvetjum áhugasöm, óháð kyni til að sækja um starfið. Vakin er athygli á markmiði mannréttindastefnu Ísafjarðarbæjar að jafna kynjaskiptingu innan starfsgreina og að vinnustaðir endurspegli fjölbreytileika samfélagsins. Öllum umsóknum verður svarað þegar ákvörðun um ráðningu hefur verið tekin.

-Við þjónum með gleði til gagns-